［楊門女將遇上哲學佬師兄弟］
記者圈子陰盛陽衰，女記者個個主動又好打得，有點楊門女將的氣勢，忽然撞入麻甩味濃烈的「哲學佬世界」，有點不適應．
那次被邀上港台電視節目《哲學有偈傾》任嘉賓已經發現，咁多集輪流出場的好幾位主持，清一色男人．做這個訪問前，請哲學界男神 Lau Po Hei替我越洋補了個習．他透露，哲學系今時今日雖然學生男女比例已一半一半，但老師仍是男士為主，傳統也會有種「師兄弟」氛圍，農曆年時一起到師傅家拜年，師母會煮飯招呼師兄弟．
而今次要訪的「sam神」，本身性格很「佬」，加上哲學人出身，對我這個哲學門外女漢子實是個挑戰．佢個腦以光速運作，跟他做訪問，我問XXX，他會禮貎地反問：請先定義XXX．我不得不進入一種「腦筋急轉彎」的智力遊戲辯論問答比賽狀態．做完訪問我簡直差不多虛脫．
這位哲學佬對語文極執着要求極高．我問一條問題，他先答一個答案．回去想了想，下次再見面，又再答第二次；回家再想了想，又再私訊我，答第三次．其實，我想弱弱一說，三次解說之間的差異，或者只有哲學人才分得出．但我又忍不住說：「如果個個受訪者有你咁認真，記者易做好多了．」
訪問哲學佬雖然腦袋有點累，但令我慶幸的是，今日訪問見報，得到佢既讚賞：「今次訪問好準確，我喜歡這種比較"輕"的寫法，也比其他訪問立體好多．」這位聲言非常不喜歡訪問的受訪者都咁講，讓我老懷安慰．
話說回來，番屋企把聲帶抄寫為筆記的過程，真係好舒服．因為第一：受訪者語言能力極高，句子完整順暢，不會像其他受訪者詞不達意；第二：受訪者言簡意賅，如果能夠用一個字就說完的話，他不會用兩個字，雖然訪問長達二個半小時，句子也不雍腫累贅；第三：雖然受訪者不易講私人嘢，但只要你問對了，他還是會「獎勵式」地作答．很有一點一分耕耘一分收獲的勵志意味．
其實，真係好得意，哲學人真係好鐘意咁講嘢：第一，第二，第三．
又其實，我sit完sam神兩堂，見證咗佢既charm同佢反駁學生的刀光劍影笑聲救班房之後（要強調，九點半堂齊人準時無學生瞓覺是一種驚世奇跡），我忍不住衝口而出跟他說了一句：
「真可惜，如果我讀大學的時候遇到像你一樣的老師，肯定比而家更醒．」
講囂同寸，郭柏年認第一，或者我都可以認下第二．哈哈，講笑啫．
Search